'34 அரசு பள்ளிகள் தரம் உயர்த்தப்படும்'--அமைச்சர் மகேஷ்

கேள்வி நேரத்தில் நடந்த விவாதம்:அ.தி.மு.க., - பால் மனோஜ் பாண்டியன்: ஆலங்குளம் தொகுதி, காவூர் உயர்நிலை பள்ளியை, மேல்நிலை பள்ளியாக தரம் உயர்த்த வேண்டும். இதற்காக, அரசுக்கு ௨ லட்சம் ரூபாய் செலுத்தப்பட்டு உள்ளது. இப்பள்ளியில் இருந்து, 8 கிலோ மீட்டர்தொலைவில் தான், மேல்நிலை பள்ளி உள்ளது. சுற்றுப்புற கிராம மாணவர்கள் பயன் பெற, இப்பள்ளியை தரம் உயர்த்த வேண்டும்.இந்த ஆண்டு எத்தனைபள்ளிகளை தரம் உயர்த்த முடிவு செய்யப்பட்டுள்ளது?

அமைச்சர் மகேஷ்: உயர்நிலை பள்ளியை மேல்நிலை பள்ளியாக தரம் உயர்த்த, பத்தாம்வகுப்பில் குறைந்தது, 100 மாணவர்கள் இருக்க வேண்டும். ஒரு மேல்நிலை பள்ளிக்கும், மற்றொரு மேல்நிலை பள்ளிக்கும் இடையே, குறைந்தது8 கிலோ மீட்டர் இடைவெளி இருக்க வேண்டும். பொதுமக்கள் பங்களிப்பாக, ௨ லட்சம்ரூபாய் செலுத்த வேண்டும். மாநகராட்சியாக இருந்தால், ஆறு கிரவுண்ட்; மாவட்டத் தலைநகரமாக இருந்தால், எட்டு கிரவுண்ட்; நகராட்சியாக இருந்தால், 10 கிரவுண்ட், பேரூராட்சியாக இருந்தால் 1 ஏக்கர்,ஊராட்சியாக இருந்தால், 3 ஏக்கர் நிலம் இருக்க வேண்டும்.காவூர் அரசு உயர்நிலை பள்ளி சார்பில், பணம் செலுத்தப்பட்டுள்ளது. பத்தாம் வகுப்பில், 29 மாணவர்கள் மட்டுமே படிக்கின்றனர். எனவே, நெறிமுறைகளை இப்பள்ளி பூர்த்தி செய்யாததால், தற்போது இயலாது.

பால் மனோஜ் பாண்டியன்: பாப்பான்குளம் உட்பட பல்வேறு கிராமங்கள் பயன் பெறும் வகையில், இப்பள்ளி தரம் உயர்த்தப்பட்டால், அப்பகுதி மாணவர்கள் பயனடைவர். இந்த ஆண்டு அமைச்சர் பரிசீலிப்பாரா?அமைச்சர் மகேஷ்: முதல்வரின் கவனத்திற்கு எடுத்து சென்று நடவடிக்கை எடுக்கப்படும். இந்த ஆண்டு, 12 தொடக்க பள்ளிகள், 22 மற்ற பள்ளிகள், தரம் உயர்த்தப்பட உள்ளன. நெறிமுறைகளை பூர்த்தி செய்யும் பள்ளிகள், படிப்படியாக தரம் உயர்த்தப்படும்.

Share: