பள்ளி கல்வித் துறை சார்பாக கேள்வி நேரத்தில் நடந்த விவாதம்

கேள்வி நேரத்தில் நடந்த விவாதம்:

தி.மு.க., - டி.ஆர்.பி.ராஜா:

மன்னார்குடி ஒன்றியம், மூவாநல்லுார் உயர்நிலைப் பள்ளிக்கு, சுற்றுச்சுவர் அமைத்து தர வேண்டும்.

அமைச்சர் மகேஷ்:

மூவாநல்லுார் பள்ளி இடம், பள்ளி கல்வித் துறைக்கு மாற்றப்படாமல் உள்ளது. மாற்றப் பட்டதும் சுற்றுச்சுவர் கட்டப்படும்.டி.ஆர்.பி.ராஜா: அதே பள்ளியில், கழிப்பறை வசதி இல்லாமல் உள்ளது. அதையும் செய்து தர வேண்டும். மேலும், பல்வேறு பள்ளிகளில், சுற்றுச்சுவர், வகுப்பறை இல்லாத சூழல் உள்ளது. அவற்றையும் செய்து தர வேண்டும்.

அமைச்சர் மகேஷ்:

இப்பள்ளியில், 128 மாணவர்கள் படிக்கின்றனர். மூன்று வகுப்பறைகள், ஓர் ஆய்வகம், கழிப்பறை வசதி உள்ளது. பத்து ஆசிரியர்கள் கல்வி கற்றுக் கொடுக்கின்றனர். பள்ளி இடம் பெயர் மாற்றம் செய்யப்பட்டதும், ஏதேனும் ஒரு திட்டத்தின் கீழ், சுற்றுச்சுவர் கட்டப்படும்.ராஜா: மன்னார்குடியில் நுாலகம் இல்லை. எனவே, 'டிஜிட்டல்' நுாலகம் அமைத்து தர வேண்டும்.

அமைச்சர் மகேஷ்:

நிதி நிலைமைக்கேற்ப பரிசீலிக்கப்படும். எம்.எல்.ஏ.,க்கள் அனைவரும் பள்ளிகளுக்கு சுற்றுச் சுவர், கட் டடம் கட்ட, கோரிக்கை விடுத்துள்ளனர். முதல்வர் தொகுதி, உதயநிதி தொகுதி யிலும், கட்டடம் கட்ட கோரிக்கை விடுத்துள்ளனர்; படிப்படியாக நிறைவேற்றப்படும்.

அ.தி.மு.க., - காமராஜ்:

திருவாரூர் மாவட்டம், வலங்கைமான், அரசு பெண்கள் மேல்நிலைப் பள்ளியில் சுற்றுச்சுவர் கட்ட வேண்டும்.

அமைச்சர் மகேஷ்:

நடவடிக்கை எடுக்கப்படும்.

காங்கிரஸ் - விஜயதாரணி:

கன்னியாகுமரி மாவட்டம், விளவங்கோடு தொகுதியில், உயர்நிலைப் பள்ளியை, மேல்நிலைப் பள்ளியாக தரம் உயர்த்த, பணம் செலுத்தப்பட்டுள்ளது. தரம் உயர்த்தி, அனைத்து வசதிகளையும், செய்து தர வேண்டும்.

அமைச்சர் மகேஷ்:

தரம் உயர்த்த, சில நிபந்தனைகள் உள்ளன. அவை பூர்த்தியானால், நடவடிக்கை எடுக்கப் படும்.

துணை சபாநாயகர் பிச்சாண்டி:

ஆரம்ப பள்ளிகளுக்கு, தேசிய ஊரக வேலை உறுதி திட்டத்தின் கீழ், சுற்றுச்சுவர் கட்டி கொடுக்கப்படுகிறது.ஆனால், உயர்நிலை மற்றும் மேல்நிலைப் பள்ளிகளுக்கு, பணி மேற்கொள்ள, ஊராட்சி துறை அனுமதி அளிப்பதில்லை. அதற்கு அனுமதி அளிக்க வேண்டும்.

அமைச்சர் மகேஷ்:

துறை அமைச்சர்களுடன் பேசி, உரிய நடவடிக்கை எடுக்கப்படும்.இவ்வாறு விவாதம் நடந்தது.

Share: