அரியர்ஸ் தேர்ச்சி விவகாரத்தில் யுஜிசி நடைமுறையே பின்பற்றப்படும்" - முதல்வர்

 

அரியர்ஸ் தேர்வு விவகாரத்தில் பல்கலைக்கழக மானியக் குழுவின் (UGC) நடைமுறைபடியே செயல்படுவோம் என்று முதலமைச்சர் எடப்பாடி பழனிசாமி தெரிவித்துள்ளார்.

மாவட்ட வாரியாக கொரோனா தடுப்பு நடவடிக்கைகள் குறித்து, முதலமைச்சர் எடப்பாடி பழனிசாமி ஆய்வு நடத்தி வருகிறார். அதன்படி, விழுப்புரம் மாவட்டத்தில் கொரோனா தடுப்பு மற்றும் வளர்ச்சி பணிகள் குறித்து ஆய்வு செய்த முதலமைச்சர், பல்வேறு திட்டங்களுக்கு அடிக்கல் நாட்டினார். பின்னர் செய்தியாளர்களுக்கு பேட்டியளித்த அவர், கொரோனாவுக்கு தமிழகத்தில் நல்லமுறையில் சிகிச்சை அளிக்கப்படுவதால், இறப்பு விகிதம் குறைந்துள்ளதாக கூறினார். அரசு அறிவித்த வழிகாட்டுதலை மக்கள் பின்பற்ற வேண்டும் என்றும், மருத்துவ உபகரணங்கள் போதிய அளவில் இருப்பு உள்ளதாகவும் கூறினார். நீட் தேர்வு வேண்டாம் என்பதே அரசின் எண்ணம் என்றும், நீட் தேர்வை எதிர்த்து நீதிமன்றம் வரை சென்றும் நீதி கிடைக்கவில்லை என்று வேதனை தெரிவித்தார். 

அரியர்ஸ் மாணவர்களின் தேர்ச்சி தொடர்பாக வதந்தி பரப்பப்படுவதாக தெரிவித்த முதலமைச்சர், உயர்கல்வி அமைச்சர் ஏற்கெனவே தமிழக அரசின் நிலையைத் தெளிவுபடுத்தி விட்டதாக தெரிவித்தார். பல்கலைக்கழக மானியக் குழுவின் நடைமுறைபடியே தமிழக அரசு செயல்படும் என்றும் தெரிவித்தார். கொரனோ பரவல் குறைந்து இயல்பு நிலைக்கு வந்த பிறகே பெற்றோர்களின் மனநிலையை ஆராய்ந்து பள்ளிகள் திறக்கப்படுவது குறித்து முடிவு செய்யப்படும் எனவும் குறிப்பிட்டார்.

Share: