பள்ளிகளை திறக்க தீவிரமாக முயல வேண்டும்: அதுகுறித்த திட்டங்கள் விரைவில் வகுக்கப்பட வேண்டும்- எய்ம்ஸ் இயக்குநர்

பள்ளிகளை திறக்க தீவிரமாக முயல வேண்டும்: எய்ம்ஸ் இயக்குநர் கருத்து

'பள்ளிகளைத் திறக்க தீவிரமாக முயல வேண்டும்' என, எய்ம்ஸ் இயக்குநர் ரன்தீப் குலேரியா தெரிவித்துள்ளார்.

கோவிட் பெருந்தொற்று பரவலால் கடந்த ஆண்டு மார்ச் மாதம் நாடு முழுவதும் ஊரடங்கு அமல்படுத்தப்பட்டது. அதைத் தொடர்ந்து கல்வி நிறுவனங்கள் மூடப்பட்டன. தொற்று பாதிப்பு குறைந்ததை அடுத்து, கடந்த ஜனவரியில் பள்ளிகள் திறக்கப்பட்டு மேல்நிலை வகுப்புகள் நடத்தப்பட்டன. கோவிட் 2வது அலை வேகமெடுத்ததால் மீண்டும் பள்ளிகள் மூடப்பட்டன. புதிய கல்வியாண்டில் ஆன்லைன் வகுப்புகள் நடைபெற்று வருகின்றன. பள்ளிகள் திறக்கப்படாத சூழலில் விளிம்புநிலைக் குழந்தைகளுக்கு இணைய வழிக் கல்வி பெரும்பாலும் சாத்தியமாகவில்லை. இந்நிலையில் எய்ம்ஸ் இயக்குநர் ரன்தீப் குலேரியா தெரிவித்துள்ளதாவது:

பள்ளிகள் பாடம் கற்பிக்கும் இடமாக மட்டும் இருப்பதில்லை. ஒவ்வொரு குழந்தையும் பள்ளியில் தனித்தனித் திறமைகளோடு வளர்கிறார்கள். சக மாணவர்களுடன் ஒவ்வொருவரும் உரையாடுகிறார்கள். குழந்தைகளிடம் தனித்திறனை வளர்ப்பதில் பள்ளிகள் முக்கியப் பங்காற்றுகின்றன.

இளம் தலைமுறை, குறிப்பாக ஆன்லைன் வகுப்புகளுக்கு வசதியில்லாத விளிம்புநிலை மாணவர்களில் கல்வி தற்போது கடுமையாக பாதித்துள்ளது. ஆகவே, மீண்டும் பள்ளிகளை திறக்க நாம் தீவிரமாக முயல வேண்டும். அதுகுறித்த திட்டங்கள் விரைவில் வகுக்கப்பட வேண்டும். இவ்வாறு அவர் தெரிவித்தார்

Share: