10 லட்சம் முகக்கவசங்கள், 6,600 லிட்டர் சானிடைசர்: ஜேஇஇ தேர்வுக்கான பணிகள் மும்முரம்

 

ஜேஇஇ மெயின் தேர்வுக்கு 10 லட்சம் முகக்கவசங்கள், 10 லட்சம் ஜோடி கையுறைகள் மற்றும் சுமார் 6,600 லிட்டர் சானிடைசர் ஏற்பாடு செய்யப்பட்டுள்ளதாக தேசிய தேர்வு முகமை தெரிவித்துள்ளது.நீட், ஜேஇஇ நுழைவுத் தேர்வுகள் திட்டமிட்டபடி நடைபெறும் என்று மத்திய அரசு ஒருபக்கம் கூறி வரும் நிலையில், மறுபக்கம் எதிர்க்கட்சிகள் அனைத்தும் ஒன்றிணைந்து, மாணவர்களின் நலன் கருதி நீட் தேர்வை ஒத்திவைக்க வேண்டும் என்று வலியுறுத்தி வருகின்றன. 

பெரும்பாலான மாநிலங்களில் கரோனா பாதிப்பு குறையாததால் மாணவர்கள் கரோனா தொற்றுக்கு ஆளாக நேரிடும் என்று கூறி தேர்வுகளை ஒத்தி வைக்க வேண்டும் என மாநில முதல்வர்கள், எதிர்க்கட்சித் தலைவர்கள், பெற்றோர்கள், மாணவர்கள் என பல்வேறு தரப்பினரும் வலியுறுத்தி வருகின்றனர். ஆனால், தேர்வுகளை நடத்துவதற்கான பணிகளில் மத்திய அரசு தீவிரமாக ஈடுபட்டுள்ளது. மாணவர்களுக்கு பாதுகாப்பான முன்னெச்சரிக்கை நடவடிக்கைகளை எடுப்பதில் தீவிரம் காட்டி வருகிறது.

 ஜேஇஇ மெயின் 2020 தேர்வுக்கு சுமார் 8.58 லட்சம் பேர் எழுத உள்ளனர். இதையடுத்து தேர்வு மையங்களில் சானிடைசர், முகக்கவசம், வெப்பநிலை அளவிடும் கருவி என அனைத்து பாதுகாப்பு உபகரணங்களும் தயாராக இருக்கும் என்று தேசிய தேர்வு முகமை தெரிவித்துள்ளது. மொத்தமாக ஜேஇஇ மெயின் தேர்வுக்கு சுமார் 10 லட்சம் முகக்கவசங்கள், 10 லட்சம் ஜோடி கையுறைகள் மற்றும் சுமார் 6,600 லிட்டர் சானிடைசர் ஏற்பாடு செய்யப்பட்டுள்ளதாகத் தெரிவிக்கப்பட்டுள்ளது.

இதுதவிர சிறப்பு மருத்துவக்குழு, மாவட்டவாரியாக தேர்வுகளை கண்காணிக்கும் அதிகாரிகள், பாதுகாப்பு நடவடிக்கைகளை உறுதி செய்ய குழு என அனைத்தும் தயாராக உள்ளது என்று கூறியுள்ளது. 

தேர்வுக்கு முன்னும் பின்னும் தேர்வு மையங்கள் முழுமையாக கிருமிநாசினி கொண்டு சுத்தம் செய்யப்படும் என்று தேர்வு முகமை கூறியுள்ளது. மருத்துவப் படிப்புகளுக்கான நீட் நுழைவுத் தேர்வு செப்டம்பர் 13 ஆம் தேதியும், ஜேஇஇ மெயின் தேர்வுகள் செப்டம்பர் 1 முதல் 6 ஆம் தேதி வரையிலும், ஜேஇஇ அட்வான்ஸ் தேர்வு செப்டம்பர் 27 ஆம் தேதியும் நடைபெற உள்ளது குறிப்பிடத்தக்கது.

Share: