கடகம் ஆங்கில புத்தாண்டு 2021 பலன்!

கடகம்  ஆங்கில புத்தாண்டு 2021 பலன்! 

.1.2021 முதல் 31.12.2021 வரை

யோகமான ஆண்டு இது

(புனர்பூசம், 4-ம் பாதம், பூசம், ஆயில்யம் வரை) 

(பெயரின் முதல் எழுத்துக்கள்: ஹி, ஹீ, ஹே, ஹோ, ட, டி, டே, டோ உள்ளவர்களுக்கும்)

கடக ராசி நேயர்களே! பிறக்கப்போகும் புத்தாண்டு உங்களுக்குப் பெருமைகளைச் சேர்க்கும் ஆண்டாக அமையப் போகின்றது. ஆண்டின் தொடக்கத்திலேயே உங்கள் ராசியை, குரு பகவான் முழுமையாகப் பார்க்கின்றார். எனவே வருமானம் திருப்திகரமாக இருக்கும். உடல்நலம் சீராகி உற்சாகத்துடன் பணிபுரிவீர்கள். கடன் சுமை தீரும். சென்ற ஆண்டில் நடைபெறாமல் ஸ்தம்பித்து நின்ற காரியங்கள், இப்பொழுது துரிதமாக நடைபெறும். அன்பு நண்பர்களின் ஆதரவு கிடைக்கும். உங்கள் ராசிநாதன் சந்திரன், உங்கள் ராசியிலேயே சஞ்சரித்தபடி புத்தாண்டு தொடங்குகின்றது. எனவே குடும்ப ஒற்றுமை பலப்படும்.

குருச்சந்திர யோகத்தோடும், நீச்சபங்க ராஜயோகத்தோடும் இந்த ஆண்டின் தொடக்கம் அமைகின்றது. நீச்சம் பெற்ற குருவாக இருந்தாலும் கூட, அவரது பார்வைக்கு பலன் கிடைக்கும். உங்கள் ராசியைப் பொறுத்தவரை 6-ம் இடத்திற்கு அதிபதியானவர் குரு. எனவே அவர் வலிமை இழக்கும் பொழுது உத்தியோகத்தில் முன்னேற்றம் ஏற்படும். வேலையில் இருந்து விலகினாலும் நிர்வாகம் மீண்டும் உங்களை அழைக்கலாம்.

புத்தாண்டின் தொடக்க நிலை

ஆண்டின் தொடக்கத்தில் உங்கள் ராசிநாதன் சந்திரன் பலம் பெற்றிருக்கின்றார். அதே நேரம் தனாதிபதி சூரியன் 6-ல் மறைந்திருக்கின்றார். இருப்பினும் 6-க்கு அதிபதியான குரு பகவான், சப்தம ஸ்தானத்தில் நீச்சம் பெற்று ‘கெட்டவன் கெட்டிடில் கிட்டிடும் ராஜயோகம்’ என்பதற்கேற்ப பலன் தரப்போகின்றார். எனவே திட்டமிடாமல் செய்யும் காரியங்களில் கூட உங்களுக்கு வெற்றி கிடைக்கும். தொழிலில் புதிய பங்குதாரர்கள் வந்திணைவர்.

சுயஜாதகம் பலம் பெற்றிருந்தால், கோட்சார பலன்களின் குறுக்கீடு எதுவும் செய்யாது. திசாபுத்தி பலம் இழந்தவர்களுக்கு திடீர் மாற்றங்களும், மகிழ்ச்சி குறைவான தகவல்களும் வரலாம். உங்கள் முன்னேற்றத்திற்கு இடையூறுகள் உருவாகும். பஞ்சம ஸ்தானத்தில் கேது இருக்கின்றார். எனவே பிள்ளைகளால் பிரச்சினை ஏற்பட்டு அகலும். ‘ஞானகாரகன்’ கேது, செவ்வாய் வீட்டில் இருப்பதால் பூமி விற்பனையும், அதன் மூலம் எதிர்பார்த்த லாபமும் வரும். என்றாலும், அந்தத் தொகை உடனடியாக விரயமாகும் சூழ்நிலை காணப்படுகிறது.

வெளிநாட்டில் இருக்கும் உறவினர்கள் மூலம் எதிர்பார்த்த காரியங்கள் நடைபெறலாம். 3, 12-க்கு அதிபதியான புதன், 7-ல் இருப்பது நன்மைதான். மாமன், மைத்துனர் வழியில் ஒத்துழைப்பு கிடைக்கும். சனியின் பலம் 7-ல் இருப்பதால் கண்டகச் சனியாக பரிணமிக்கின்றார். எனவே விரயங்கள் இந்த ஆண்டு கூடுதலாக இருக்கும். அதே நேரம் வருமானமும் உங்களுக்கு செலவிற்கேற்ற விதம் அதிகரிக்கும். ஆரோக்கியத் தொல்லை ஏற்படக்கூடிய வாய்ப்பு உண்டு. இருப்பினும் குருவோடு சனி இணைந்திருப்பதால் பயப்படத் தேவையில்லை. உங்கள் ராசிக்கு யோககாரகனாக விளங்கும் செவ்வாய் ஆட்சி பெற்றிருப்பதால், வீழ்ச்சியில் இருந்து எழுச்சியடையும் யோகம் உண்டு.

மகர குருவின் சஞ்சாரம்

ஆண்டின் தொடக்கத்தில் மகர ராசியில் சஞ்சரிக்கும் குரு பகவான், உங்கள் ராசியைப் பார்ப்பதோடு 3, 11 ஆகிய இடங்களையும் பார்க்கின்றார். உங்கள் ராசியைப் பார்ப்பதால் மனக்கவலை அகலும். பணப்புழக்கம் அதிகரிக்கும். உங்கள் ராசிக்கு 6, 9 ஆகிய இடங்களுக்கு அதிபதியானவர் குரு பகவான். தற்சமயம் 7-ம் இடத்தில் சஞ்சரிக்கின்றார். எதிர்ப்பு, வியாதி, கடன் ஆகியவற்றைக் குறிக்கும் இடத்திற்கு அதிபதியான குரு நீச்சம் பெறும்பொழுது, அவற்றின் தாக்கத்தில் இருந்து நீங்கள் விடுபட இயலும். குறிப்பாக எதிரிகளின் தொல்லை குறையும். திறமைக்கு அங்கீகாரம் கிடைக்கும். தொல்லை தந்த நோய்கள் அகலும். கடன் சுமை குறையும்.

9-ம் இடத்திற்கும் அதிபதியாக குரு விளங்குவதால் தந்தை வழி உறவில் இருந்த விரிசல்கள் அகலும். பெற்றோர்களின் உதவி கிடைக்கும். முன்னோர்களின் சொத்துக்களை முறை யாக பிரித்துக்கொடுக்க முன்வருவர். அண்ணன், தம்பிகளின் அரவணைப்பு உண்டு. இதுவரை உங்களைவிட்டு விலகி இருந்த சகோதரர்கள் இப்பொழுது மீண்டும் வந்திணையலாம். ஆலயத் திருப்பணிகளிலும் ஆர்வம் காட்டுவீர்கள். வைத்திருக்கும் பழைய வாகனத்தைக் கொடுத்துவிட்டுப் புதிய வாகனங்கள் வாங்க வேண்டுமென்ற ஆர்வம் இப்பொழுது கைகூடும்.

குருவின் பார்வை பலன்கள்

புத்தாண்டில் மகரத்தில் சஞ்சரிக்கும் குரு பகவான், சப்தமப் பார்வையாக உங்கள் ராசியைப் பார்க்கின்றார். எனவே திட்டமிட்ட காரியம் திட்டமிட்டபடியே நடைபெறும். திடீர் மாற்றங்கள் உருவானாலும் அது நன்மை தரும் விதமாகவே அமையும். வெற்றிக்குரிய செய்திகள் வீடு வந்து சேரும். வீண் விவகாரங்களில் இருந்து விடுபடுவீர்கள். உற்றார், உறவினர்கள் உங்கள் முன்னேற்றம் கண்டு ஆச்சரியப்படுவர். உத்தியோகத்தில் உள்ளவர்கள் அதிகாரிகளின் அன்புக்கு பாத்திரமாகி, வேண்டிய சலுகைகளைப் பெறுவர்.

குருவின் பார்வை 3, 11 ஆகிய இடங்களிலும் பதிகின்றது. எனவே வெற்றிகள் ஸ்தானம் மற்றும் லாப ஸ்தானம் புனிதமடைகிறது. வழக்குகளில் வெற்றி கிடைக்கும். வருங்கால நலன் கருதி எடுத்த முயற்சிகளுக்கு பலன் உண்டு. குடும்பத்தில் மகிழ்ச்சி கூடும். வியாபாரத்தில் இருந்த தேக்கநிலை மாறும். பொதுநலத்தில் இருப்பவர்களுக்கு மக்கள் செல்வாக்கு அதிகரிக்கும். மேலிடத்தில் இருந்து தானாகவே உங்களுக்கு உயர் பொறுப்புகள் தரப்படலாம். லாப ஸ்தானத்தில் குருவின் பார்வை பதிவதால் பொருளாதாரப் பற்றாக்குறை அகலும்.

கும்ப குருவின் சஞ்சார காலத்தில், அதன் பார்வை உங்கள் ராசிக்கு 2, 4, 12 ஆகிய இடங்களில் பதிகின்றது. எனவே கொடிகட்டிப் பறந்த குடும்பப் பிரச்சினை அகலும். அடிப்படை வசதிகளைப் பெருக்கிக் கொள்வீர்கள். அசையா சொத்துக்கள் வாங்கும் யோகம் உண்டு. வெளிநாட்டில் இருந்து எதிர்பார்த்த நல்ல தகவல் வரலாம். பிள்ளைகளின் மேற்படிப்பு சம்பந்தமாக வெளிமாநிலம் அல்லது வெளிநாடுகளுக்கு செல்ல முயற்சி செய்தவர்களுக்கு இப்போது நல்ல தகவல் கிடைக்கும். கல்யாணம் போன்ற சுப காரியங்களுக்கு விரயங் களைச் செய்ய முன்வருவீர்கள். பயணங்கள் பலன்தரும் விதம் அமையும். குடி இருக்கும் வீட்டால் சில பிரச்சினைகள் உருவாகலாம். இடமாற்றங்களால் இனிமை காண்பீர்கள்.

குருவின் வக்ர காலம்

16.6.2021 முதல் 13.9.2021 வரை, கும்ப ராசியில் குரு வக்ரம் பெறுகின்றார். இக்காலத்தில் கொஞ்சம் குடும்பச்சுமை கூடும். ‘வாங்கிய கடனை கொடுக்க முடியவில்லையே’ என்று கவலைப்படுவீர்கள். உடல்நலச் சீர்கேடுகளால் உள்ளத்தில் கவலை ஏற்படும். வீடு மாற்றங்களும், உத்தியோக மாற்றங்களும் விரும்பத்தகாத விதத்தில் வரலாம். விரயங்கள் கூடுதலாக இருக்கும். உதவி செய்வதாகச் சொன்னவர்கள் கடைசி நேரத்தில் கையை விரிக்கலாம். பொதுவாழ்வில் வீண் பழிக்கு ஆளாக நேரிடும். கூட்டாளிகளை அனுசரித்துச் சென்றால்தான் ஆதாயங்களை வரவழைத்துக் கொள்ள இயலும்.

14.9.2021 முதல் 13.10.2021 வரை, மகர ராசியில் குரு வக்ரம் பெறுகிறார். இதன் விளைவாக உத்தியோகத்தில் உடன் பணிபுரிபவர்களால் உபத்திரவம் ஏற்படும். உங்கள் முன்னேற்றத்தை முன்னதாகச் சொல்வதன் மூலம் அதில் தடைகள் உருவாகிவிடும். எனவே எதையும் யோசித்துப் பேசுவது நல்லது. அண்ணன், தம்பிகளிடம் அனுசரித்துச் செல்லுங்கள். பொதுவாக கிரகங்களின் வக்ர காலங்களில் எதையும் ஒருமுறைக்குப் பலமுறை யோசித்துச் செய்யுங்கள்.

சனியின் வக்ர காலம்

12.5.2021 முதல் 26.9.2021 வரை மகரத்தில் சனி வக்ரம் பெறுகின்றார். இக்காலத்தில் ஆரோக்கியப் பாதிப்புகள் அதிகரிக்கும். வீண் விரயங்கள் உண்டு. உறவினர்களுக்கு நன்மை செய்தாலும் அது தீமையாகவே தெரியும். நடக்கும் தொழிலில் கூட்டாளிகள் விலகலாம். அலைச்சலுக்கேற்ற ஆதாயம் கிடைக்காது. வாகனங்களில் செல்லும்பொழுது கூடுதல் கவனம் தேவை. மனப்பயம் அதிகரிக்கும். உத்தியோகத்தில் உள்ளவர்கள் மிகமிக கவனத்துடன் செயல்பட வேண்டிய நேரம் இது. உங்களிடம் கொடுத்த பொறுப்பை மற்றவர்களிடம் ஒப்படைத்தால் அது நிறைவேறாமல் போகலாம். எனவே மேலதிகாரிகளின் வெறுப்புக்கு ஆளாக நேரிடும். பிறருக்கு பொறுப்பு சொல்லி பணம் வாங்கி கொடுப்பதன் மூலம் பிரச்சினைகள் அதிகரிக்கும்.

செவ்வாய் - சனி பார்வைக் காலம்

14.4.2021 முதல் 3.6.2021 வரை மிதுன ராசியில் சஞ்சரிக்கும் செவ்வாய், மகர ராசியில் சஞ்சரிக்கும் சனியைப் பார்க்கின்றார். அதே சமயம் கும்பத்தில் சஞ்சரிக்கும் குரு செவ்வாயைப் பார்த்து புனிதப்படுத்துகின்றார். 4.6.2021 முதல் 21.7.2021 வரை கடகத்தில் சஞ்சரிக்கும் நீச்சம் பெற்ற செவ்வாய், மகரத்தில் சஞ்சரிக்கும் சனியை சப்தமப் பார்வையாகப் பார்க்கின்றார். இதுபோன்ற காலங்களில் மிகவும் விழிப்புணர்ச்சி தேவை. என்னதான் நீங்கள் முறையாக செயல்பட்டாலும், எதிரிகள் உங்கள் செயல்பாடுகளில் குறை காண்பர். பணம் வாங்கல் - கொடுக்கல்களில் ஒரு சிலருக்கு ஏமாற்றத்தைச் சந்திக்க நேரிடும். குடும்பத்தில் மருத்துவச் செலவுகள் கூடுதலாக இருக்கும். வாகனங்களில் செல்லும்பொழுது கவனம் தேவை. உத்தியோகப் பிரச்சினை தலைதூக்கும். மாற்றங்கள் திடீரென வந்து மனக்கலக்கத்தை உருவாக்கும்.

வளர்ச்சி தரும் வழிபாடு

இந்தப் புத்தாண்டில் எதிர்பார்ப்புகள் எளிதில் நிறை வேற திங்கட்கிழமை தோறும் வடக்கு நோக்கிய அம்பிகையை வழிபட்டு வருவது நல்லது. பவுர்ணமி அன்று முருகப்பெருமானை வழிபடுவதால் முன்னேற்றம் கூடும்.

பெண்களுக்கான பலன்கள்

இந்தப் புத்தாண்டு நீங்கள் விழிப்புணர்ச்சியோடு செயல்பட வேண்டிய ஆண்டாகும். உடன்பிறப்புகளையும், உறவினர்களையும் அனுசரித்துச் செல்லுங்கள். உடல்நலத்திற்கு ஒவ்வாத உணவுகளை உட்கொள்ள வேண்டாம். கணவன்-மனைவிக்குள் ஒற்றுமை பலப்பட வேண்டுமானால் ஒருவரை ஒருவர் புரிந்துகொண்டு செயல்பட வேண்டும். தாயின் ஆதரவு கிடைக்கும். சகோதரர்களும் உங்களுக்கு அனுகூலமாக நடந்து கொள்வர். பிள்ளைகளுக்கு வேலை கிடைப்பதிலும், மாலை கிடைப்பதிலும் இருந்த தடை அகலும். பணிபுரியும் பெண்களுக்கு விரும்பத்தகாத இடத்திற்கு இடமாற்றங்கள் வரலாம். கண்டகச் சனியின் ஆதிக்கம் நடப்பதால் சனிக்கிழமை சனி பகவான் வழிபாடு சஞ்சலங்களைத் தீர்க்கும்.

Share: