மேஷம் ஆங்கில புத்தாண்டு 2021 பலன்!

மேஷம்  ஆங்கில புத்தாண்டு 2021 பலன்! 

1.1.2021 முதல் 31.12.2021 வரை

மக்கள் செல்வாக்கு அதிகரிக்கும்

(அசுவதி, பரணி, கார்த்திகை 1-ம் பாதம் வரை)

 (பெயரின் முதல் எழுத்துக்கள்: சு, சே, சோ, ல, லி, லு, லே, லோ, அ உள்ளவர்களுக்கு)

மேஷ ராசி நேயர்களே!

நீங்கள் எதிர்பார்த்துக் காத்திருந்த ஆங்கிலப் புத்தாண்டு வந்துவிட்டது. வருடத் தொடக்கத்திலேயே உங்கள் ராசிக்கு 2-ம் இடமான வாக்கு, தனம், குடும்பம் என்பதை எடுத்துரைக்கும் இடத்தில் குருவின் பார்வை பதிகின்றது. அதுமட்டுமல்ல ராசிநாதன் செவ்வாய், உங்கள் ராசியிலேயே சஞ்சரிக்கின்றார். சுக ஸ்தானாதிபதி சந்திரன் சுக ஸ்தானத்திலேயே இருக்க, தொழில் ஸ்தானாதிபதி சனி தொழில் ஸ்தானத்திலேயே பலம் பெற்றுச் சஞ்சரிக்கின்றார். பொருளாதாரம், சுகம், தொழில் ஆகிய மூன்று ஸ்தானங்களும் சிறப்பாக அமைந்து ஆண்டு தொடங்குவதால், இந்த ஆண்டு உங்களுக்கு மகிழ்ச்சி தரும் ஆண்டாக அமையப்போகின்றது.

குருச்சந்திர யோகத்தோடும், நீச்ச பங்க ராஜயோகத்தோடும் ஆண்டின் தொடக்கம் அமைகின்றது. நீச்சம் பெற்ற குரு, சொந்த வீட்டில் பலம்பெற்ற சனியோடு சஞ்சரிப்பதால் 10-ம் இடம் எனப்படும் தொழில் ஸ்தானம் பலம் பெறுகின்றது. எனவே சென்ற ஆண்டு தொழிலில் ஏற்பட்ட தடைகள் அனைத்தும் விலகும். தனவரவிற்கு பஞ்சம் ஏற்படாது.

புத்தாண்டின் தொடக்க நிலை

புத்தாண்டின் தொடக்கத்தில் உங்கள் ராசிநாதன் செவ்வாய், உங்கள் ராசியிலேயே சஞ்சரிப்பது யோகம்தான். சென்ற ஆண்டில் ஏற்பட்ட ஆரோக்கியத் தொல்லைகளும், மருத்துவச் செலவுகளும் குறையும். உற்சாகத்தோடு பணிபுரிவீர்கள். 2-ல் ராகு இருப்பதால் பணப்புழக்கம் நன்றாக இருக்கும். ‘வாங்கியதைக் கொடுக்க முடியவில்லையே, கொடுத்ததை வாங்க முடியவில்லையே’ என்று கவலைப்பட்டவர்களுக்கு, இப்பொழுது நல்ல நேரம் வந்து விட்டது. பணப்பற்றாக்குறை அகலும். பாக்கிகள் வசூலாகிப் பரவசப்படுத்தும். அஷ்டமத்தில் கேது, சுக்ரனோடு கூடியிருக்கின்றார். எனவே ஆன்மிக நாட்டம் அதிகரிக்கும்.

பஞ்சமாதிபதி சூரியன் 9-ம் இடத்தில் இருக்கின்றார். எனவே பெற்றோர் வழியில் பிரியம் கூடும். அவர்களின் ஆதரவும் கிடைக்கும். தொழில் ஸ்தானத்தில் மூன்று கிரகங்கள் பலம்பெற்றிருக்கின்றன. புதன், வியாழன், சனி ஆகியவை ஒன்று கூடி கூட்டுக்கிரக யோகமாக தொழில் ஸ்தானத்தில் சஞ்சரிப்பதால், தொழில் கூட்டாளிகள் உங்கள் குணமறிந்து நடந்து கொள்வர். வாடகைக் கட்டிடத்தில் நடைபெற்ற தொழிலை, சொந்தக் கட்டிடத்திற்கு மாற்றும் வாய்ப்பு உருவாகும். உங்கள் நீண்ட நாளையக் கனவுகள் நனவாகும்.

மேலும் இந்த புத்தாண்டில் பொருளாதார மேம்பாடு அதிகரிக்கவும், நோய், நொடி இல்லாத வாழ்க்கை அமையவும் உங்கள் சுய ஜாதகத்தில் தெசாபுத்திக்கேற்ற தெய்வ வழிபாடுகளை யோகபலம் பெற்ற நாளில் செய்து வருவது நல்லது.

மகர குருவின் சஞ்சாரம்

உங்கள் ராசிக்கு 9, 12 ஆகிய இடங்களுக்கு அதிபதியானவர், குரு. அவர் 10-ம் இடத்தில் சஞ்சரிக்கும் பொழுது, தொழில் ஸ்தானம் புனிதமடைகின்றது. எனவே தொழில் வளர்ச்சி சிறப்பாக இருக்கும்.

பிதுர் ரார்ஜித ஸ்தானத்திற்கும், விரய ஸ்தானத்திற்கும் அதிபதியானவர் குரு. அவர் தொழில் ஸ்தானத்தில் சஞ்சரிக்கும் பொழுது, ஒரு சிலர் தந்தை வழி சொத்துக்களை விற்று, அதன் மூலம் வரும் தன லாபத்தைக் கொண்டு தொழிலை விரிவுசெய்ய முயற்சிப்பார்கள். உத்தியோகத்தில் உள்ளவர்களுக்கு உயர்மட்ட அதிகாரிகளின் பழக்கத்தால் நல்ல வாய்ப்புகள் தேடி வரும். மறுக்கப்பட்ட சலுகைகள் கிடைக்கும். பணிநீக்கம் செய்யப்பட்டவர்கள் கூட மீண்டும் பணியில் சேர வாய்ப்பு உண்டு.

குருவின் பார்வை பலன்கள்

2021-ம் ஆண்டில் மகரத்தில் குரு சஞ்சரிக்கும் பொழுது, அதன் பார்வை 2, 4, 6 ஆகிய இடங்களில் பதிவாகின்றது. கும்பத்தில் குரு சஞ்சரிக்கும் பொழுது, 3, 5, 7 ஆகிய இடங்களில் குருவின் பார்வை பதிகின்றது. மகர குருவின் சஞ்சார காலத்தில் உங்களுடைய மதிப்பும், மரியாதையும் உயரும். மக்கள் செல்வாக்கால் மகிழ்ச்சி கூடும்.

கும்ப குருவின் சஞ்சார காலத்தில் அதன் பார்வை பலத்தால் சகோதர ஒற்றுமை பலப்படும். உடன்பிறப்புகளின் வழியில் தொழில் தொடங்கும் முயற்சி ஒரு சிலருக்கு கைகூடும். பஞ்சாயத்துக்கள் சாதகமாக முடியும். பணப்பொறுப்பு சொல்லி வாங்கிக் கொடுத்த தொகையும் வந்து சேரும். பூர்வீக சொத்துக்களால் ஆதாயம் உண்டு. கல்யாணம் போன்ற சுபகாரியங்கள் இல்லத்தில் நடைபெறுவதில் இருந்த தடைகள் அகலும். உங்களுக்கோ, உங்கள் உடன்பிறப்புகளுக்கோ, உங்கள் குழந்தைகளுக்கோ திருமண முயற்சியில் தடைகளும், தாமதங்களும், தடுமாற்றங்களும் ஏற்பட்டிருந்தால் அது இனிமாறும். வாசலோடு நின்ற வரன்கள் இனி வீட்டிற்குள் வந்து பொருந்திய செய்தியை எடுத்துரைக்கும். மேலும் பெற்றோர்களின் மணிவிழா, முத்துவிழா, பவளவிழா போன்றவற்றையும், பிள்ளைகளின் பிறந்தநாள் விழாக்களையும் நடத்தும் யோகம் உண்டு.

குருவின் வக்ர காலம்

16.6.2021 முதல் 13.9.2021 வரை, கும்ப ராசியில் குரு வக்ரம் பெறுகின்றார். இக்காலத்தில் விரயாதிபதி, லாப ஸ்தானத்தில் வக்ரம் பெறுவதால் லாபங்கள் அனைத்தும் விரயமாகி விடும். வெளிநாட்டில் இருப்பவர்கள் சொந்த ஊர் திரும்ப முடியாமலும், சொந்த ஊரில் இருப்பவர்கள் வெளிநாடு செல்ல முடியாமலும் ஆகும் சூழ்நிலைகள் அமையும். திட்டமிட்ட காரியங்களை திட்டமிட்டபடியே செய்து முடிக்க இயலாது. பொருளாதாரப் பற்றாக்குறை ஏற்படும். சேமிப்பு கொஞ்சம் கரையலாம். சிக்கனத்தைக் கையாண்டு தேவைகளைப் பூர்த்தி செய்துகொள்ள வேண்டிய நேரம் இது.

14.9.2021 முதல் 13.10.2021 வரை, மகர ராசியில் குரு வக்ரம் பெறுகின்றார். இக்காலத்தில் தொழிலில் மிகுந்த கவனம் தேவை. தொழில் மாற்றங்களும், தொழில் நிலையத்தில் இடமாற்றங்களும் ஏற்படலாம். கூட்டாளிகள் உங்கள் குணமறிந்து நடந்துகொள்ள மறுப்பர். ‘எங்களுக்குரிய பங்கை கொடுத்து விடுங்கள். நாங்கள் விலகிக்கொள்கிறோம்’ என்று அச்சுறுத்துவர். நிதானத்தோடு செயல்படவேண்டிய நேரம் இது. உத்தியோகத்தில் உள்ளவர்களுக்கு உயர் அதிகாரிகளுடன் பகை ஏற்படும். பக்கத்தில் பணிபுரிபவர்களால் சிக்கல்கள் உருவாகும். ‘வேலை போய்விடுமோ’ என்ற பதற்றம் அதிகரிக்கும்.

சனியின் வக்ர காலம்

12.5.2021 முதல் 26.9.2021 வரை மகரத்தில் சஞ்சரிக்கும் சனி வக்ரம் பெறுகின்றார். உங்கள் ராசிக்கு 10, 11 ஆகிய இடங்களுக்கு அதிபதியானவர், சனி பகவான். அவர் வக்ரம் பெறுவது அவ்வளவு நல்லதல்ல. தொழிலில் எவ்வளவு விழிப்புணர்ச்சியோடு இருந்தாலும், மூன்றாம் நபர்களின் குறுக்கீடுகள் அதிகரிக்கும். சூடுபிடித்த வியாபாரம் மந்த நிலைக்கு வரலாம். ‘பிறரின் திருஷ்டி பட்டுவிட்டதோ’ என்று நினைப்பீர்கள். சொத்துத் தகராறுகள் தலைதூக்கும். சொந்தங்களுக்குள் சர்ச்சைகள் வரலாம். இளைய சகோதரத்தோடு இருந்த உறவில் விரிசல்கள் ஏற்படும். புதியவர்களை நம்பி, பொறுப்புகளை ஒப்படைக்க வேண்டாம். பிறருக்கு பொறுப்பு சொல்வதன் மூலம் பிரச்சினைகள் ஏற்படலாம். வேலைப்பளு கூடும். புதிய முயற்சிகள்் செய்யும் பொழுது, முன்னதாக அதைப்பற்றி யாரிடமும் சொல்ல வேண்டாம். பெற்றோர்களின் ஆரோக்கியத்தில் திடீரெனப் பாதிப்புகள் ஏற்படலாம்.

கவனமுடன் செயல்பட வேண்டிய காலம்

14.4.2021 முதல் 3.6.2021 வரை, மிதுனச் செவ்வாய் மகரச் சனியைப் பார்க்கிறார். மீண்டும் 4.6.2021 முதல் 21.7.2021 வரை கடகச் செவ்வாய் மகரச் சனியைப் பார்க்கின்றார். இக்காலம் செவ்வாய்-சனி பார்வை காலமாகும். இக்காலத்தில் மக்கள் அனைவருமே கவனமுடன் இருக்க வேண்டியது அவசியம். அதே நேரம் உங்கள் ராசிநாதனாக செவ்வாய் அமைவதாலும், தொழில் மற்றும் லாப ஸ்்தானத்திற்கு அதிபதியாக சனி விளங்குவதாலும் உடல் ஆரோக்கியத்தில் மிகுந்த கவனம் தேவை. சிறு தொல்லைகள் வந்தாலும் உடனடியாக மருத்துவ ஆலோசனைகளைப் பெறுவது நல்லது. மனக்குழப்பங்கள் அதிகரிக்கும். குடும்ப பிரச்சினை கொடிகட்டிப் பறக்கும். குறுக்கீடு சக்திகள் அதிகரிக்கும். வரவைக் காட்டிலும் செலவு இருமடங்கு உண்டு. அனுபவஸ்தர்களின் ஆலோசனையும், அருளாளர்களின் வழிகாட்டுதல்களும், இந்த காலகட்டத்தை இனிமையாக அமைத்துக்கொடுக்கும்.

வளர்ச்சி தரும் வழிபாடு

உங்கள் ராசிநாதன் செவ்வாய் என்பதால் முருகப்பெருமான் வழிபாட்டை முறையாகச் செய்து வருவதோடு, யோகபலம் பெற்ற நாளில் அங்காரக தலங்களுக்குச் சென்று வழிபட்டு வருவது நல்லது.

பெண்களுக்கான பலன்கள்

இந்தப் புத்தாண்டில் உங்களுக்கு வளர்ச்சி கூடுத லாக இருக்கும். வாய்ப்புகள் வந்து அலைமோதும். கொடுக்கல் -வாங்கல்களில் திருப்தி ஏற்படும். குரு பார்வை குடும்ப ஸ்தானத்தில் பதிவதால், கணவன்- மனைவிக்குள் ஒற்றுமை பலப்படும். அசையாச் சொத்துக்கள் வாங்கும் யோகம் உண்டு. கும்பத்தில் குரு சஞ்சரிக்கும் காலத்தில் பிள்ளைகளின் கல்யாண முயற்சிகள் கைகூடும். தாய் மற்றும் சகோதரர்களின் ஒத்துழைப்பு திருப்தி தரும். செவ்வாய் - சனி பார்வை காலத்தில் மனக்குழப்பம் அதிகரிக்கலாம். ஆரோக்கியத்திலும் மிகமிக கவனம் தேவை. பணிபுரியும் பெண்களுக்கு முன்னேற்றம் அதிகரிக்கும். எதிர்பார்த்தபடி பணி நிரந்தரமும், ஊதிய உயர்வும் கிடைக்கலாம்.

Share: