விருச்சிகம் ஆங்கில புத்தாண்டு 2021 பலன்!

விருச்சிகம்  ஆங்கில புத்தாண்டு 2021 பலன்! 

1.1.2021 முதல் 31.12.2021 வரை

தொட்ட காரியங்களில் வெற்றி கிடைக்கும்

(விசாகம் 4 ம் பாதம், அனுஷம், கேட்டை வரை)

(பெயரின் முதல் எழுத்துக்கள்: தோ, ந, நி, நே, நோ, ய, யி, யு உள்ளவர்களுக்கு)

விருச்சிக ராசி நேயர்களே! எதிர்பார்த்துக் காத்திருந்த புத்தாண்டு பிறக்கப்போகிறது. ஏழரைச்சனி விலகி இனிய பலன்தரும் நேரம் இது என்பதால், இனி தொட்ட காரியங்களில் வெற்றி கிடைக்கும். பொருளாதாரத்தில் நிறைவு ஏற்படும். புகழ் மிக்கவர்களின் பட்டியலில் இடம் பிடிப்பீர்கள். ஜென்மத்தில் கேது இருப்பதால் ஆன்மிக நாட்டம் அதிகரிக்கும். தொழில் வளர்ச்சி சிறப்பாக இருக்கும்.

ஆண்டின் தொடக்கத்தில் குருச்சந்திர யோகம், நீச்சபங்க ராஜயோகம் போன்ற யோகங்கள் இருப்பதாலும் உங்கள் ராசிநாதன் செவ்வாய் மேஷத்தில் பலம்பெற்று சஞ்சரிப்பதாலும் இந்த ஆண்டு உங்கள் எதிர்பார்ப்புகள் அனைத்தும் நிறைவேறும். இல்லம் தேடி நல்ல தகவல் வந்தபடி இருக்கும். குடும்ப ஒற்றுமை பலப்படும்.

புத்தாண்டின் தொடக்க நிலை

உங்கள் ராசிநாதன் செவ்வாய் சொந்த வீட்டில் சஞ்சரிப்பதால் ஆரோக்கியத் தொல்லை அகலும். ஆதாயம் தரும் தகவல்கள் அதிகம் கிடைக்கும். அசையாச் சொத்து வாங்கும் முயற்சி கைகூடும். அதிகார வர்க்கத்தில் உள்ளவர்கள் உங்களுக்கு ஆதரவு கொடுக்க முன்வருவர். புதுமுயற்சிகளில் வெற்றி காண்பீர்கள். மதிநுட்பத்தால் மகத்தான காரியங்கள் பலவும் செய்து காட்டுவீர்கள். உடன்பிறப்புகள் பகை மறந்து செயல்படுவர். அதுமட்டுமல்லாமல் உங்கள் பணிக்கும் உறுதுணையாகவும் இருப்பர். நகை வாங்குவது முதல் நல்ல வாகனம் வாங்கும் யோகம் வரை படிப்படியான முன்னேற்றம் ஏற்படும்.

ஜென்மத்தில் கேதுவும், 7-ல் ராகுவும் இருப்பதால் காலசர்ப்ப தோஷ அமைப்பு உள்ளது. எனவே சர்ப்ப சாந்திப் பரிகாரங்களை செய்துகொள்வதன் மூலம் சந்தோஷ வாய்ப்புகளை எந்த நாளும் வரவழைத்துக்கொள்ள இயலும். ராசியிலேயே சுக்ரன் சஞ்சரிப்பதால் ஆடை, ஆபரண சேர்க்கை உண்டு. வாக்கு ஸ்தானத்தில் சூரியன் இருப்பதால் கோபம் அதிகம் வரலாம். தேவையில்லாத விவகாரங்களில் தலையிடுவதை தவிர்ப்பதோடு, பதற்றத்தையும் குறைத்துக் கொள்வது நல்லது. 3-ல் புதன் இருப்பதால் மாமன், மைத்துனர் வழியில் மகிழ்ச்சியான தகவல் வந்து சேரும். கரைந்த சேமிப்புகளை ஈடுகட்டுவீர்கள். கல்வி சம்பந்தமாக எடுத்த முயற்சி கைகூடும். உத்தியோகத்தில் உள்ளவர்கள் மேலதிகாரிகளின் நட்புக்கு ஆளாகி முன்னேற்றத்தை வரவழைத்துக் கொள்வர். உயர்பதவியும், ஊதிய உயர்வும் கிடைக்கும் யோகம் உண்டு.

மகர குருவின் சஞ்சாரம்

ஆண்டின் தொடக்கத்தில் குரு பகவான் மகர ராசியில் சஞ்சரிக்கின்றார். உங்கள் ராசிக்கு 2, 5 ஆகிய இடங்களுக்கு அதிபதியானவர் குரு. அவர் நீச்சம் பெறுவதால் வருமானம் ஒருசில சமயங்களில் பற்றாக்குறையாகவும் இருக்கும். ஒருசில சமயங்களில் மிதமிஞ்சிய பொருளாதாரமாகவும் இருக்கும். சில காரியங்களைச் செய்யத் தொடங்கும் பொழுது, ‘பணத்தை கையில் வைத்துக்கொண்டு செய்ய முடியவில்லையே’ என்று கவலைப்பட வேண்டாம். காரியத்தைத் தொடங்கிவிட்டால் கடைசி நேரத்தில் கேட்ட இடத்தில் உதவிகள் கிடைத்துவிடும். குடும்பத்தில் உள்ளவர்களில் ஒரு சிலரது குணம் மாறலாம். அவர்கள் கருத்துக்களை புரிந்து கொண்டு செயல்படுவது நல்லது. குடும்ப உறுப்பினர்களின் தேவைகளைப் பூர்த்தி செய்ய ஒரு தொகையைச் செலவிடுவீர்கள். மாற்று இனத்தாரின் ஒத்துழைப்பால், உங்கள் கூட்டு முயற்சிக்கு வெற்றி கிடைக்கும்.

5-ம் இடத்திற்கு அதிபதியாக குரு பகவான் விளங்குவதால் அவர் மகரத்தில் சஞ்சரிக்கும் பொழுது ‘நீச்ச பங்க ராஜயோகம்’ பெற்றிருப்பதால் பிள்ளைகளின் உயர்கல்விக்காகவும், எதிர்கால முன்னேற்றம் கருதியும் செலவிடும் சூழ்நிலை உண்டு. பெண் பிள்ளைகளின் சுபச்சடங்குகள் நடைபெறும் வாய்ப்பு உண்டு. சீர்வரிசைப் பொருட்கள் வாங்குவதில் ஆர்வம் கூடும். தங்கம், வெள்ளி, ஆடை, ஆபரணப்பொருட்கள் வாங்கி சுபவிரயங்களை மேற்கொள்வதன் மூலம் வீண் விரயங்களிலிருந்து விடுபடலாம். வீட்டை விரிவு செய்து கட்டுவது, கட்டிய வீட்டைப் பழுது பார்ப்பது போன்றவற்றிற்கு செலவிட்டு, இருக்கும் இடத்தைப் புதுப்பித்துக்கொள்ளலாம். ‘வாங்கிய கடனைக் கொடுக்க முடியவில்லையே, கொடுத்த கடனை வாங்க முடியவில்லையே’ என்று கவலைப்பட்டவர்களுக்கு, கொடுக்கல்- வாங்கல்கள் இனி ஒழுங்காகும்.

குருவின் பார்வை பலன்கள்

புத்தாண்டில் மகரத்தில் சஞ்சரிக்கும் குருவின் பார்வை, உங்கள் ராசிக்கு 7, 9, 11 ஆகிய மூன்று இடங்களில் பதிகின்றது. எனவே அந்த இடங்கள் எல்லாம் புனிதமடைகின்றன. ‘குரு பார்க்கக் கோடி நன்மை’ என்பதால் அந்த மூன்று இடங்களுக்குரிய ஆதிபத்யங்களும் சிறப்பாக நடைபெறும். இல்லற வாழ்வு சிறப்பாக அமையும். வசந்த காலம் உருவாக வழிவகை பிறக்கும். மங்கல ஓசை மனையில் கேட்கும். தொழில் வளர்ச்சியில் புதியவர்களின் பங்களிப்பு உண்டு. வெளிநாட்டில் இருந்து அனுகூலமான தகவல் வரலாம். ‘வாசல் தேடி வந்த வரன்களும் கைவிட்டுப் போகிறதே’ என்ற கவலை இனிமாறும். வந்த வரன்கள் உங்களுக்குப் பொருத்தமான வரன்களாக அமையலாம். தந்தை வழி உறவு வலுப்பெறும். தீர்த்த யாத்திரைகளும், தெய்வ வழிபாடுகளும் நீங்கள் நினைத்ததை நிறைவேற்றி வைக்கும். சங்கிலித் தொடர்போல வந்த கடன் சுமை இனி படிப்படியாகக் குறையும். பகையாக இருந்த நண்பர்கள் உறவாக மாறுவதோடு, பக்கபலமாகவும் இருப்பர். பணிபுரியும் இடத்தில் உங்களுக்கு நல்ல பெயர் கிடைக்கும்.

கும்ப குருவின் சஞ்சார காலத்தில், குருவின் பார்வை 8, 10, 12 ஆகிய இடங்களில் பதிகின்றது. எனவே ஆரோக்கியம் சீராகி ஆனந்தப்படுத்தும். உற்சாகத்தோடு செயல்படுவீர்கள். தொழில் கூட்டாளிகள் லாபம் வரும் வழியை எடுத்துரைப்பர். அலுவலகத்தில் கேட்ட சலுகைகள் கிடைக்கும். உங்கள் திறமைக்கு கிடைக்கும் அங்கீகாரத்தால் புகழ்பெறுவீர்கள். பயணங்கள் பலன் தருவதாக அமையும். இல்லத்திற்கு தேவையான அத்தியாவசியப் பொருட்கள் மட்டுமல்லாமல் ஆடம்பரப் பொருட்களையும் வாங்கி மகிழ்வீர்கள். பழைய நகைகளைக் கொடுத்துவிட்டுப் புதிய நகைகளை வாங்கி மகிழும் யோகம் உண்டு. அதே போல் வாகன மாற்றம் செய்ய உகந்த நேரமிது. ஒருசிலருக்கு வீடுகட்டிக் குடியேறும் யோகம் எதிர்பாராத விதத்தில் அமையும். சுபகாரியங்களை செய்யக்கூடிய சந்தர்ப்பம் கூடிவரும்.

குருவின் வக்ர காலம்

16.6.2021 முதல் 13.9.2021 வரை, கும்ப ராசியில் குரு வக்ரம் பெறுகின்றார். உங்கள் ராசிக்கு 4-ம் இடத்தில் குரு பகவான் வக்ரம் பெறுவதால், செய்தொழிலில் கவனம் தேவை. வியக்கும் சம்பவங்கள் வீட்டில் அடிக்கடி நடைபெறலாம். ‘புது முயற்சிகளில் ஈடுபடுவோமா, வேண்டாமா?’ என்று இரட்டித்த சிந்தனை மேலோங்கும். பொதுவாக உங்களுடைய ராசி மனதுகாரகன் சந்திரன் நீச்சம் பெறும் ராசியாகும். எனவே சிந்தனை ஆற்றல் அதிகரிக்கும். ‘இதைச் செய்வோமா? அதைச் செய்வோமா?’ என்ற மனக்குழப்பம் அதிகரிக்கும். பிறருக்கு வாங்கிக் கொடுத்த தொகையைப் போராடி திரும்பப் பெற வேண்டிய நிர்ப்பந்தம் உருவாகும்.

14.9.2021 முதல் 13.10.2021 வரை, மகர ராசியில் குரு வக்ரம் பெறுகின்றார். குரு பகவான் உங்கள் ராசிக்கு 3-ம் இடத்தில் வக்ரம் பெறும்பொழுது சுபச்செலவுகள் அதிகரிக்கும். ‘நடக்குமோ, நடக்காதோ’ என்று நினைத்த காரியம் திடீரென நடைபெறும். தேவையற்ற கடன்களை தவிர்ப்பது நல்லது. பணி இடத்தில் கவனம் தேவை. வெள்ளிக்கிழமை தோறும் ஆனைமுகனுக்கு சிதறுகாய் உடைத்தால் துன்பங்கள் சிதறி ஓடும். பிள்ளைகளால் பெருமை உண்டு என்றாலும் பிரச்சினைகளையும் அடிக்கடி சந்திக்க நேரிடும். எனவே அவர்களை உங்கள் மேற்பார்வையில் வைத்துக்கொள்வது நல்லது. கல்யாணக் கனவுகள் நனவாகும்.

சனியின் வக்ர காலம்

12.5.2021 முதல் 26.9.2021 வரை, மகரத்தில் சனி வக்ரம் பெறுகின்றார். உங்கள் ராசிக்கு 3, 4 ஆகிய இடங்களுக்கு அதிபதியானவர் சனி பகவான். அவர் வக்ரம் பெறும்பொழுது சகோதரர்கள் மற்றும் குடும்ப உறுப்பினர்களின் குணத்தில் மாற்றம் ஏற்படலாம். தட்டிக்கொடுத்தும் கொட்டிக்கொடுத்தும் வேலை வாங்க வேண்டிய நேரமிது. வாகனம், வீடு மற்றும் தெய்வ தரிசனங்கள் ஆகியவற்றில் கவனம் செலுத்துவீர்கள். பழைய வாகனத்தைக் கொடுத்து புதிய வாகனம் வாங்கும் முயற்சி கைகூடும். தாயின் ஆதரவு ஓரளவு கிடைக்கும். பழைய கடன்களை கொடுத்து மகிழ்வீர்கள். செல்போன் வழி பேச்சுக்களால் செய்யும் தொழிலில் வரும் ஒப்பந்தங்கள் அதிகரிக்கும். யோசித்து ஏற்றுக்கொள்வது நல்லது. சகோதரர்களை அனுசரித்துச் செல்வதன் மூலம் ஆதாயம் உண்டு.

கவனமுடன் செயல்பட வேண்டிய காலம்

14.4.2021 முதல் 3.6.2021 வரை, 4.6.2021 முதல் 21.7.2021 வரை செவ்வாய்-சனி பார்வை காலமாகும். இக்காலத்தில் கொஞ்சம் கவனமுடன் செயல்பட வேண்டும். குறிப்பாக செவ்வாய் உங்கள் ராசிநாதன் மற்றும் 6-ம் இடத்திற்கும் அதிபதி. அந்த செவ்வாயின் பார்வை சனி மீது பதிவதால் ஆரோக்கியத்தில் கவனம் தேவை. உடல்நலத்திற்கு ஒவ்வாத உணவுகளை உட்கொள்ள வேண்டாம். அகால நேரத்தில் சாப்பிடுவது, அலைச்சலைக் கூட்டிக்கொள்வது போன்றவற்றை தவிர்த்தால், இக்காலத்தை நீங்கள் இனிய காலமாக மாற்றிக்கொள்ள இயலும். உத்தியோகத்தில் கொஞ்சம் வேலைப்பளு கூடும். சலுகைகளைக் கேட்டுப்பெற வேண்டிய சூழ்நிலை உருவாகும். செவ்வாய், சனிக்குரிய வழிபாடுகளை முறையாகச் செய்வது நல்லது.

வளர்ச்சி தரும் வழிபாடு

இல்லத்து பூஜை அறையில் கற்பக விநாயகர் படம் வைத்து, காரியசித்தி மாலை படித்து வழிபடுவது நல்லது. செவ்வாய்க்கிழமை அன்று வராஹியை வழிபட்டால் நலமும் வளமும் கிடைக்கும்.

பெண்களுக்கான பலன்கள்

இந்தப் புத்தாண்டு உங்களுக்குப் பொன் கொழிக்கும் ஆண்டாக அமையப்போகின்றது. கல்யாணக் கனவுகள் நனவாகும். கணவன்-மனைவிக்குள் ஒற்றுமை பலப்படும். ஆரோக்கியத்தில் மட்டும் கொஞ்சம் அக்கறை காட்டுவது நல்லது. பூர்வீக சொத்துக்களால் லாபம் உண்டு. தாய்வழி ஆதரவு, சகோதர வர்க்கத்தினரின் ஒத்துழைப்பு மகிழ்ச்சி தரும். அசையாச் சொத்துக்களை உங்கள் பெயரில் வாங்கி, கட்டிடம் கட்டும் யோகம் அமையும். பணிபுரியும் பெண்களுக்கு திறமை பளிச்சிடும். செவ்வாய்-சனி பார்வை காலத்தில் கொஞ்சம் கூடுதல் விழிப்புணர்ச்சி தேவை. பிள்ளைகளின் முன்னேற்றம் சிறப்பாக இருக்கும். பைரவர் வழிபாடு வலிமை சேர்க்கும்.

Share: