துலாம் ஆங்கில புத்தாண்டு 2021 பலன்!

துலாம்  ஆங்கில புத்தாண்டு 2021 பலன்! 

1.1.2021 முதல் 31.12.2021 வரை

விரயங்களைச் சமாளிக்க வேண்டிய ஆண்டு

(சித்திரை 3, 4 பாதங்கள், சுவாதி, விசாகம், 1, 2, 3 பாதங்கள் வரை)

(பெயரின் முதல் எழுத்துக்கள்: ர, ரி, ரு, ரே, த, தி, து, தே உள்ளவர்களுக்கும்)

துலா ராசி நேயர்களே! புத்தாண்டின் தொடக்கத்தில் உங்கள் ராசிக்கு 4-ம் இடத்தில், குரு மற்றும் சனி ஆகிய இரண்டு கிரகங்கள் சஞ்சரிக்கின்றார்கள். அர்த்தாஷ்டம குருவாகவும், அர்த்தாஷ்டமச் சனியாகவும் சஞ்சரிப்பதால், ஆரோக்கியத்தில் அதிக கவனம் செலுத்த வேண்டிய ஆண்டாகவும், கூடுதல் விரயங்களைக் கொடுக்கும் ஆண்டாகவும் அமையும் என்றே கருதலாம். சுக ஸ்தானத்தில் வலிமையான கிரகங்கள் சஞ்சரிப்பதோடு, இரண்டில் கேதுவும், எட்டில் ராகுவும் இருந்து சர்ப்ப தோஷ அமைப்பை உருவாக்குகிறது. எனவே ஏற்றமும், இறக்கமும் கலந்த நிலை உருவாகும்.

குருச்சந்திர யோகம் மற்றும் நீச்சபங்க ராஜயோகம் போன்ற யோகங்கள், இந்த ஆண்டின் தொடக்கத்தில் உருவாகின்றது. கிரக நிலைகள் சாதகமாக இருக்கும் பட்சத்தில் எதைச் செய்தாலும் வெற்றி கிடைக்கும். ஆனால் அர்த்தாஷ்டமச் சனி என்ற அமைப்பு உங்கள் ராசிக்கு வருவதால் எதிர்பாராத மற்றும் எதிர்பார்த்த விரயங்களும் ஏற்படலாம். எதையும் ஒருமுறைக்குப் பலமுறை யோசித்தும், அனுபவஸ்தர்களின் ஆலோசனைகளைக் கேட்டும் செயல்பட்டால் சிரமங்களில் இருந்து விடுபட இயலும்.

புத்தாண்டின் தொடக்க நிலை

வருடத் தொடக்கத்தில் உங்கள் ராசிநாதன் சுக்ரன், தன ஸ்தானத்தில் சஞ்சரிக்கின்றார். அவரோடு கேதுவும் இருக்கின்றார். அஷ்டம ஸ்தானத்தில் ராகு இருக்கின்றார். இரண்டு பாம்பு கிரகங்களின் ஆதிக்கத்திற்குள் சந்திரன் நீங்கலாக மற்ற கிரகங்கள் அனைத்தும் இருக்கின்றன. எனவே இனம்புரியாத கவலை தொடர்ந்தபடியே இருக்கும். பண வரவு ஒரு மடங்கு வந்தால் செலவு இரு மடங்காக உயரும்.

சர்ப்ப சாந்திப் பரிகாரங்களை முறையாகச் செய்வது நல்லது. வாக்கு ஸ்தானத்தில் கேது இருப்பதால் கொடுத்த வாக்கை காப்பாற்ற இயலாது. குடும்பத்தில் ஒருவருக்கொருவர் மனக்கசப்பு ஏற்பட்டு பாராமுகமாக இருப்பர். 3-ல் சூரியன் உள்ளதால் இடமாற்றங்கள் எளிதில் கிடைக்கும். உடன்பிறப்புகளில் ஒருசிலர் உயர்ந்த நிலையை அடைய சந்தர்ப்பங்கள் கைகூடிவரும். அரசியல் மற்றும் பொதுநலத்தில் இருப்பவர்களுக்கு மக்கள் செல்வாக்கு குறையாமல் பார்த்துக்கொள்ளுங்கள்.

அர்த்தாஷ்டம குரு மற்றும் அர்த்தாஷ்டம சனியின் ஆதிக்கத்தால் ஆரோக்கியத் தொல்லைகளும், மருத்துவச் செலவுகளும் அதிகரிக்கும். வியாபாரத்தில் சறுக்கல்கள் ஏற்படும். வாகனப் பழுதுகளும், வாகனங்களால் பிரச்சினைகளும் உருவாகலாம். புதனின் பலத்தால் பயணங்கள் அதிகரிக்கும். உத்தியோகத்தில் உள்ளவர்கள் திடீரென இடமாற்றங்களைச் சந்திக்க நேரிடும். 7-ல் செவ்வாய் இருப்பதால் சுபவிரயங்கள் அதிகரிக்கும். பூமி வாங்கும் யோகம் உண்டு. அப்படி இடம் வாங்கும் பொழுது, விசாரித்து வாங்குவது நல்லது. அஷ்டமத்தில் ராகு இருப்பதால் அலைச்சல் அதிகரிக்கும். உழைப்பிற்கேற்ற பலன் கிடைக்காது.

மகர குருவின் சஞ்சாரம்

ஆண்டின் தொடக்கத்தில் குரு பகவான் மகர ராசியில் சஞ்சரிக்கின்றார். உங்கள் ராசிக்கு 4-ம் இடத்தில் நீச்சம் பெறுகின்றார். 3, 6 ஆகிய இடங்களுக்கு அதிபதியான குரு பகவான் நீச்சம் பெறுவது யோகம்தான். மறைவிடத்திற்கு அதிபதி நீச்சம் பெறும்பொழுது, ஓரளவு நற்பலன்களையே வழங்கும். குறிப்பாக சகோதர ஒற்றுமை பலப்பட வைக்கும். உத்தியோகத்தில் வேலைப்பளு அதிகரித்தாலும் சிறப்பாகச்செய்து முடிப்பீர்கள். பூர்வீக சொத்துக்களை பங்கிட்டுக் கொள்ளும் பஞ்சாயத்துக்கள், இழுபறி நிலையில்தான் இருக்கும்.

6-ம் இடத்திற்கு அதிபதியாகவும் குரு பகவான் விளங்குவதால், அவர் நீச்சம் பெறுவது ஒருவழிக்கு நன்மைதான். குரு வலிமை இழக்கும் நேரம் வளர்ச்சி கூடும். ‘கெட்டவன் கெட்டிடில் கிட்டிடும் ராஜயோகம்’ என்பதற்கேற்ப சில நல்ல வாய்ப்புகளும் வரலாம். பணவரவு திருப்திகரமாக இருக்கும். தொழில் செய்பவர்கள் ‘மூலதனம் போதவில்லையே’ என்று கவலைப்பட வேண் டாம். வெளிநாட்டில் உள்ள உறவினர்களோ, நண்பர்களோ உங்களுக்கு உதவிக்கரம் நீட்டுவர். சகப் பணியாளர்களால் ஏற்பட்ட தொல்லையின் விளைவாக புதிய உத்தியோகத்தில் சேர ஆர்வம் காட்டுவீர்கள். ஆரோக்கியத்தில் மட்டும் அதிக அக்கறை காட்ட வேண்டும். சங்கிலித் தொடர்போல வந்த கடன் சுமை குறைவதற்கான அறிகுறிகள் தென்படும். என்றைக்கோ வாங்கிப்போட்ட இடம் இப்பொழுது பலமடங்கு விலை உயர்ந்து, அதை விற்பதன் மூலம் வரும் தொகையால் வாங்கல் -கொடுக்கல்களை ஒழுங்கு செய்துகொள்வீர்கள்.

குருவின் பார்வை பலன்கள்

புத்தாண்டில் மகரத்தில் சஞ்சரிக்கும் குருவின் பார்வை, உங்கள் ராசிக்கு 8, 10, 12 ஆகிய இடங்களில் பதிகின்றது. எனவே இந்த இடங்கள் எல்லாம் புனிதமடைகின்றது. 8-ம் இடத்தை குரு பார்ப்பதால் இழப்புகள் ஏற்பட்டாலும் அதை ஈடுசெய்யும் வாய்ப்பு கிடைக்கும். உடல் ஆரோக்கியத்தில் கொஞ்சம் அக்கறை செலுத்த வேண்டிய நேரம் என்றாலும், மாற்று மருத்துவத்தை மேற்கொண்டால் நோய் துரித கதியில் குணமாகும். அடகுவைத்த நகைகளை மீட்டுக்கொண்டு வரும் வாய்ப்பு கிட்டும். தொழிலை விரிவுசெய்ய வங்கிகளில் கேட்ட கடனுதவி கிடைக்கலாம். பெண் பிள்ளைகளின் திருமணம் போன்ற சுபகாரியங்கள் நடைபெறுவதற்கான வழிபிறக்கும். வெளிநாட்டிலிருந்து வர முடியாத நிலையிலிருந்த உறவினர்கள், இப்பொழுது சொந்த ஊர் திரும்புவார்கள்.

கும்ப குருவின் வக்ர காலத்தில் குருவின் பார்வை உங்கள் ராசியிலேயே பதிகின்றது. 5-ம் இடத்தில் சஞ்சரிக்கும் குரு பகவான் 9-ம் பார்வையாக உங்கள் ராசியைப் பார்க்கிறார். ‘ஐந்தும், ஒன்பதும் மிஞ்சும் பலன்தரும்’ என்பதற்கேற்ப பொருளாதாரத்தில் உள்ள பற்றாக்குறை மாறும். புதிய திட்டங்கள் தீட்டி வெற்றி காண்பீர்கள். குலதெய்வப் பிரார்த்தனைகளை நிறைவேற்றும் சூழல் நிலவும். குடியிருக்கும் வீட்டால் ஏற்பட்ட பிரச்சினை அகலும். தந்தை வழி உறவில் ஏற்பட்ட விரிசல்கள் மாறி தகுந்த ஆதரவு கிடைக்கும். பெற்றோர்கள் கேட்ட உதவியைச் செய்வர். மூத்த சகோதரத்தால் ஏற்பட்ட முட்டுக்கட்டைகள் அகலும். வெளிமாநிலங்களில் பணிபுரிய அழைப்புகள் வரலாம். அதிகாரப் பதவியில் உள்ளவர்களின் ஆதரவு கிடைக்கும்.

குருவின் வக்ர காலம்

16.6.2021 முதல் 13.9.2021 வரை, கும்ப ராசியில் குரு வக்ரம் பெறுகின்றார். உங்கள் ராசிக்கு 5-ம் இடமான பூர்வ புண்ணிய ஸ்தானத்தில் குரு வக்ரம் பெறுவதால் பிள்ளைகளின் பழக்க வழக்கத்தில் மாறுதல்கள் ஏற்படும். பிரச்சினைகள் உருவாகாமல் இருக்க அவர்களை உங்கள் கண்காணிப்பிலேயே வைத்துக்கொள்ளுங்கள். வாங்கிய சொத்துக்களால் பிரச்சினைகள் ஏற்படும். நம்பிக்கைக்குரிய பணியாளர்கள் உங்களை விட்டு விலக நேரிடலாம். நண்பர்களை நம்பி செயல்பட இயலாது. முக்கியப் புள்ளிகள் உங்கள் முன்னேற்றத்தில் குறுக்கிடுவர். நிச்சயித்த காரியங்களில் மாற்றங்கள் ஏற்படும். வரும் வரன்களில் கூட தடை ஏற்படலாம்.

14.9.2021 முதல் 13.10.2021 வரை, மகர ராசியில் குரு வக்ரம் பெறுகின்றார். 4-ல் குரு வக்ரம் பெறும்பொழுது மருத்துவச் செலவுகள் அதிகரிக்கும். ‘ஆரோக்கியத்தை சீராக வைத்துக்கொள்ள முடியவில்லையே’ என்று கவலைப்படுவீர்கள். வீட்டில் உள்ள மின்சாதனப் பொருட்கள் அடிக்கடி பழுதாகி கவலை யைக் கொடுக்கும். அலுவலகத் தகவல்களை அடுத்தவர்களிடம் சொல்ல வேண்டாம். வியாபாரத்தில் நெளிவு, சுளிவுகளை உங்களோடு இருந்து கற்றுக்கொண்ட பணியாளர்கள் திடீரென விலக நேரிடும். உத்தியோகத்தில் கேட்ட சலுகைகள் கிடைப்பது அரிது. வியாபாரப் போட்டிகள் அதிகரிக்கும். நிதானத்துடன் செயல்பட வேண்டிய நேரமிது.

சனியின் வக்ர காலம்

12.5.2021 முதல் 26.9.2021 வரை மகரத்தில் சனி வக்ரம் பெறுகின்றார். உங்கள் ராசிக்கு 4, 5 ஆகிய இடங்களுக்கு அதிபதியானவர் சனி பகவான். அவர் வக்ரம் பெறுவது அவ்வளவு நல்லதல்ல. குடும்பத்தில் குழப்பங்கள் அதிகரிக்கும். கூட்டாளிகள் உங்கள் நம்பிக்கைக்குரிய விதம் நடந்துகொள்ள மாட்டார்கள். கேட்ட இடத்தில் உதவிகள் கிடைப்பது அரிது. தாய்வழி உறவினர்களால் பகை உண்டு. இடம் வாங்கும் முயற்சியில் தாமதங்கள் ஏற்படுவது மட்டுமல்லாமல் பத்திரப்பதிவில் சிக்கல்களும் வரலாம். பொதுவாழ்வில் இருப்பவர்களுக்கு பொறுப்புகள் திடீரென மாற்றப்பட்டு மனக்கவலையைக் கொடுக்கும்.

கவனமுடன் செயல்பட வேண்டிய காலம்

14.4.2021 முதல் 3.6.2021 வரை, 4.6.2021 முதல் 21.7.2021 வரை செவ்வாய்-சனி பார்வைக் காலமாகும். இக்காலத்தில் நீங்கள் கவனத்துடன் செயல்பட வேண்டியது அவசியம். செவ்வாய் உங்கள் ராசிக்கு 2, 7 ஆகிய இடங்களுக்கு அதிபதியானவர். அவரது பார்வை சனியின் மீது பதியும்பொழுது குடும்ப ஒற்றுமை குறையலாம். கொடுக்கல் -வாங்கல்களில் திருப்தி ஏற்படாது. வாங்கிய இடத்தை விற்க நேரிடும். பிள்ளைகள் உங்கள் சொற்களுக்கு கட்டுப்பட்டு நடக்க மறுப்பர். வாழ்க்கைத் துணையோடும் பிரச்சினைகள் வந்து அலைமோதும். தாயின் உடல்நலத்தில் தாக்குதல் ஏற்பட்டு அகலும். வளர்ப்பு பிராணிகளிடம் எச்சரிக்கையோடு இருப்பது நல்லது. வருமானப் பற்றாக்குறையின் காரணமாக கடன் வாங்க நேரிடும். முக்கியப் புள்ளிகளை பகைத்துக்கொள்ள வேண்டாம். பணிச்சுமை அதிகரிக்கும். ‘படிப்புக்கேற்ற வேலை கிடைக்கவில்லையே’ என்று கவலைப்படுவீர்கள். உத்தியோகத்தில் கேட்ட சலுகைகள் மறுக்கப்படலாம். ‘விருப்ப ஓய்வில் வெளிவரலாமா?’ என்று சிந்திப்பீர்கள்.

வளர்ச்சி தரும் வழிபாடு

வெள்ளிக்கிழமை தோறும் மகாலட்சுமி வழிபாட்டை மேற்கொள்வது நல்லது. இல்லத்தில் அஷ்டலட்சுமியின் படம் வைத்து, லட்சுமி கவச பாராயணங்கள் செய்தால் லட்சியங்கள் நிறைவேறும்.

பெண்களுக்கான பலன்கள்

இந்தப் புத்தாண்டு ஆரோக்கியத்தில் அக்கறை காட்ட வேண்டிய ஆண்டாக அமையும். அதுமட்டுமல்ல பொருளாதாரத்திலும் பற்றாக்குறை ஏற்படலாம். எதையும் ஒருமுறைக்குப் பலமுறை யோசித்துச் செய்வது நல்லது. கணவன்-மனைவிக்குள் பிணக்குகள் அகன்று இணக்கம் ஏற்பட விட்டுக்கொடுத்துச் செல்ல வேண்டும். மூட்டுவலி, முழங்கால்வலி போன்றவை வந்து தொல்லை தரலாம். தாய்வழி ஆதரவு உண்டு. ஒருசில உடன்பிறப்புகள் உங்கள் குணமறிந்து நடந்து கொள்வர். பணிபுரியும் பெண்கள் சகப்பணியாளர்களிடம் வேலைகளைப் பற்றியோ, தங்கள் முன்னேற்றத்தைப் பற்றியோ விமர்சனம் செய்யக்கூடாது. பதவி உயர்வில் தடை இருக்கும்.

Share: